တစ်ချိန်တုန်းက ချောင်းသာ

တစ်ခါတစ်ခါ ငယ်ငယ်က အကြောင်းတွေ ပြန်စဉ်းစားမိရင် အရမ်းကို နုပျိုလန်းဆန်းသွားစေတယ်၊ အထူးသဖြင့် ငယ်သူငယ်ချင်းတွေနဲ့  ပြန်ဆုံတဲ့ အခါမှာ ကိုယ့်ကိုယ်ကို ဆယ်ကျော်သက် ဘဝကို ပြန်ရောက်သွားသလိုပါပဲ။
မနေ့ က ရွာက သူငယ်ချင်းတစ်ယောက်နဲ့  ဖုန်းပြောဖြစ်တော့ သူငယ်ချင်းတော်တော်များများ ကလေးအဖေ ရာထူးတွေ ရကုန်ပြီဆိုတာ သိခဲ့ရတယ်။ ကိုယ့်မှာတော့ အခုထိ Lonely [ ကြုံတုန်း ကြော်ငြာဝင်တာပါ....း)]

ဒါနဲ့ ပဲ သူနဲ့  တော်တော်ကြာ ဖုန်းပြောလိုက်ပြီးတော့ ငယ်ငယ်က အကြောင်းတွေ ခေါင်းထဲ တန်းစီပြီး ဝင်လာရော၊ ဆယ်တန်းဖြေပြီးတော့ သူငယ်ချင်းတွေ အကုန် စုပြီး ချောင်းသာသွားတာကို ပြန်ပြီးသတိရမိတယ်။

၁၉၉၃ လောက်ကပေါ့ ဆယ်တန်းစာမေးပွဲကို ကျွန်တော်တို့  သူငယ်ချင်းတွေအားလုံး ဖြေပြီးတဲ့ အချိန်မှာ ကျွန်တော်တို့  အားလုံးဟာ လယ်ယာပြန်စား ရေး ဖြစ်ကုန်ရော၊ တက္ကသိုလ်တက်ဖို့ ဆိုတာ စောင့်ဦးဟဲ့ နှစ်နှစ်။ ဒါနဲ့ ဘဲ တစ်ယောက်သောသူက အကြံပြုလာတယ်၊ သင်္ကြန်ရောက်ရင် တစ်နေရာရာ ခရီးထွက်ဖို့  အကြောင်း အဆိုပြုလာတယ်။

ဒါနဲ့ ပဲ အားလုံးစုံညီ ဆုံးဖြတ်လိုက်တာ ချောင်းသာ ကမ်းခြေကိုရွေးလိုက်ကြတယ်။ သူငယ်ချင်းခုနှစ်ယောက်ကလည်း ညီသလားမမေးနဲ့ ၊ တစ်ယောက် အဆိုပြုရင် ကျန်ခြောက်ယောက် ထောက်ခံပြီးသား ကန့် ကွက်မဲမရှိ။ ချောင်းသာလို့  အဆိုပြုရတာလည်း ဒီကမ်းခြေကို ကျွန်တော်တို့ ဘဘကြီးတွေက စပြီး မြန်မာ့အသံမှာ ပြနေတာ တော်တော်ကို သာသာယာယာ ရှိနေလို့ လည်းပါတယ်။ (ဘတ် လမ်းခရီး အကြောင်းတော့ မပြပါ)

ဒါနဲ့ ပဲ အားလုံးစုပြီး တိုင်ပင်ကြတော့ သူငယ်ချင်းတစ်ယောက်က သူအိမ်ကနေ ပတ်ပလေကာတစ်စီးရယ်၊ ကားမောင်းဖို့  ဦးသြဘာဆိုတဲ့ လူပျိုကြီးတစ်ယောက်ထည့်ပေးလိုက်တယ်။ ဒါနဲ့ ပဲ သင်္ကြန်မကျခင် နှစ်ရက်အလို စထွက်ဖို့  စီစဉ်လိုက်တယ်။ ခရီးစဉ်အတွက် လိုအပ်တာတွေ စီစဉ်ပြီး ခရီးထွက်မယ့်နေ့ ကို စောင့်ရတာ စိတ်ကူးနဲ့ တင် တော်တော် ပျော်ဖို့  ကောင်းနေတယ်။

ဒီလိုနဲ့ သတ်မှတ်ထားတဲ့ နေ့ ရောက်ရော မနက်ကိုးနာရီ လောက်စုရပ်ကနေ စထွက်လာခဲ့တယ်။ ပထမဦးဆုံး လှိုင်သာယာဇတ်ဆိပ်ကို ၁၀နာရီလောက် ရောက်ရော၊ ကျွန်တော်တို့  ဘဝမှာ အုပ်ထိန်းသူမပါပဲ ရန်ကုန်ပြင်ပကို ခရီးထွက်တာ ဒါပထမဦးဆုံးအကြိမ်ပေါ့။ ဇတ်ဆိပ်ရောက်တော့ ထုံးစံအတိုင်း စောင့်ရရော၊ အဲဒီအချိန်က လှိုင်သာယာတံတားလည်း မထိုးရသေးဘူး။

၁၀နာရီခွဲလောက် အလှည့်ရောက်တော့ လှိုင်သာယာဘက်ကို ဇတ်နဲ့ ကူးပါတော့တယ်။ ကျွန်တော့်ရဲ့ ပထမဦးဆုံး ဇတ်စီးဖူးခြင်းပါ။ မိနစ်၂၀လောက်ကြာတော့ လှိုင်သာယာဘက်ခြမ်းကို ရောက်ရော ကျွန်တော်တို့ ကားလေးဟာ ရန်ကုန် ညောင်တုန်း လမ်းပေါ်ကနေ ညောင်တုန်း ဘက်ကို ဦးတည်ပြီး မောင်းတော့တာပါပဲ။

ဒီလိုနဲ့  မွန်းလွဲ ၁၂ နာရီခွဲ လောက် ညောင်တုန်း စကော့ဇတ်ဆိပ်ကို ရောက်တော့မှ ပေးကမ်းခြင်းသည် အောင်မြင်ရာ၏ ဆိုတဲ့ ဆောင်ပုဒ်မှန်ကန်ကြောင်းကို လက်တွေ့  သိခဲ့ရတယ်။ ဇတ်ကူးမယ့် ကားတွေ တန်းစီထားတာ မျက်စိတစ်ဆုံး ကိုယ်တွေကလည်း နိုင်ငံကြီးသားပီသစွာ ကျူတန်းကြီးထဲ ဝင်စီရော၊ တော်တော်နဲ့  မရွေ့ တစ်ခါတစ်ရံ ကိုယ်နောက်က ကားတွေက ဇတ်ပေါ်ရောက် ကိုယ်ကားက ဒီနေရာကဒီနေရာပဲ။ ကိုယ်တွေကလည်း ချာတိတ်တွေဆိုတော့ ဒါမျိုး နားမလည်၊ ညနေ ၃ နာရီလောက်ကျမှပဲ ကျွန်တော်တို့ အလှည့် ရောက်လာတယ်။

ဒါတောင်မှ ကျွန်တော်တို့  သွားပြီး ပူညံပူညံ လုပ်လွန်းလို့ နဲ့ တူတယ်၊ သူတို့ ကတော့ ထင်မှာပဲ ဒီချာတိတ်တွေ အရိပ်သုံးပါး နားမလည်ဘူးလို့ ...း) ။ မလုပ်လို့ လည်း မရဘူးလေ၊ ပုသိမ်ရောက်ရင် နောက်ဇတ်တစ်ခု ကူးဖို့  ကျန်သေးတယ်။ အဲဒီဇတ်က ညနေ ၆ နာရီဆို ပိတ်ပြီတဲ့။ ဒါနဲ့  ၃ နာရီ ၄၅ မိနစ်မှာ စကော့ ဘက်ခြမ်းရောက်တယ်။

ကျွန်တော်တို့  ကားလေးဟာ စကော့ ပုသိမ် လမ်းပေါ်မှာ ဟိုက်စပိနဲ့ ပုသိမ်ကို အမှီရောက်ဖို့  မောင်းရတော့တယ်။ အဲဒီလမ်းဟာ ကြာနီကန်ဆရာတော်ဘုရားဟောသလို ပြောရရင် ကျောက်ခဲ စားသွားရင် အစာကြေမယ့်လမ်း ခင်ဗျ။ လမ်းလို့ သာပြောတာ ကျောက်ခဲတွေပဲ ခင်းထားပြီး ကတ္တရာကို မရှိတယ့်လမ်း၊

ကျွန်တော်တို့ ကားဟာ ပတ်ပလေကာ ဖြစ်တာကြောင့် နောက်ခန်းကို ခဲစတွေ လာစင်တယ်၊ ဒါနဲ့  ရွှေဥာဏ်တော် စူးရှပြီး နောက်တံခါးကို လှန်ချထာလိုက်တော့ ခဲစင်နဲနဲ သက်သာသွာပါတော့တယ်၊ ဒါပေမယ့် ပုသိမ်ရောက်လို့ ပြန်ကြည့်လိုက်တယ့် အခါမှာတော့ ပတ်ပလေကာနောက်ဖုံးမှာ ဆေးရောင်လုံးဝ မရှိတော့ပါဘူး။ (ပြန်ရောက်တော့ ကားပိုင်ရှင် သူငယ်ချင်းလည်း အိမ်ကနေ ၃ရက်လောက် ဆင်းလိုက်ရတယ်)

ညနေ ၅ နာရီ ၄၅ လောက်မှာ ပုသိမ်မြို့ထဲကို ရောက်တော့တယ်၊ ဒါနဲ့ ပဲ တစ်ဘက်ကမ်း ကူးဖို့  ဇတ်ဆိပ် လိုက်ရှာကြတာ ပုသိမ်မြို့ ထဲမှာတင် လည်နေတော့တယ်။ ကျွန်တော်တို့ ရဲ့ လမ်းသူရဲဆန်တယ့် အပြုအမှုတွေ ကြောင့်လားမသိဘူး လမ်းညွှန်တဲ့ လူက ပို့ မယ့်ပို့  ကူတို့ ကို မပို့ ဘူး။ အဲဒီလိုနဲ့  ညနေ ၆နာရီ ၁၅ မိနစ်လောက်မှ ဇတ်ဆိပ်ကို ရောက်ပါတော့တယ်။ နောက်ကျ သွားပြီပေါ့။

ဇတ်ကိုတော့ ရေလည်မှာ မြင်သာမြင်နေရတယ်။ ကမ်းကနေ တရွေ့ ရွေ့ ခွါနေလျှက်ပေါ့......၊

(ဆက်ပါဦးမည်)